İsrail BMT-ni Qəzzaya gələn yük maşınlarının sayını səhv hesablamaqda ittiham edir

İsrail hökumətinin Fələstin Ərazilərindəki Fəaliyyətlərinin Koordinasiyası İdarəsi BMT-ni Qəzza zolağına daxil olan humanitar yardım maşınlarının sayını səhv hesablamaqda ittiham edib.
AJMEDİA.İNFO xəbər verir ki, bu barədə idarənin “X”də yaydığı bəyanatda deyilir.
“Humanitar yardım məlumatlarının düzgün toplanması və dərc edilməsi vacibdir. Bir çox təşkilatların məlumatlarına əsaslanan BMT məlumatlarının dəqiq olması çox vacibdir. Bununla belə, sayılan və BMT-yə bildirilən humanitar yardım maşınlarının sayında ciddi uyğunsuzluqlar var”, - məlumatda qeyd olunur.
Bildirilib ki, aprel ayında dərc edilmiş məlumatlarda uyğunsuzluqlar demək olar ki, min avtomobilə çatıb. Belə ki, 5,7 min yük maşını BMT, 6,6 mini isə idarə tərəfindən hesablanıb. May ayı üçün isə rəqəmlər 4 dəfədən çox fərqli olub. BMT may ayında Qəzzaya humanitar yardım daşıyan 1479 yük maşınının, idarə isə 6359 yük maşınının daxil olduğunu bildirib.
Qeyd olunub ki, burada marşrutundan, Fələstinə giriş nöqtəsindən və ya yükün mənşəyindən asılı olmayaraq bütün yük maşınları ehtiva edilir. Eyni zamanda, İsrail hakimiyyət orqanlarına görə, BMT yalnız müəyyən keçid məntəqələrindən məlumatları təqdim edir, həmçinin yalnız beynəlxalq təşkilatın və onun bəzi tərəfdaşlarının köməyini nəzərə alır.