Bakıda məktəbdə QALMAQAL: "Oğlanın müəllim bibisi qızıma böhtan atıb, məktəbdən..."

Paytaxtın Yasamal rayonu, 161 nömrəli orta məktəbinin müəllimi və valideyn arasında gərginlik yaşanıb.

AJMEDİA.İNFO xəbər verir ki, bu barədə məlumat BAKU.WS-in “qaynar xətti”nə daxil olub.

Valideyn iddia edir ki, onun qızı Ayselə (adlar şərtidir) müəllimlər tərəfindən böhtan atılıb.Guya qızı, Əsmər müəllimin qardaşı oğlu Hüseynlə sevgilidir. Elə buna görə də qızını məktəbdən qovublar:

“Fevralın 13-ü Hüseynlə bibisi Əsmər müəllim qızımı məktəbdən qovdular. Qızımın sinif rəhbəri də Əsmər müəllimdən qorxur. Ona görə bizim başımıza belə oyun açırlar”.

Hətta valideyn baş verən hadisələrlə bağlı qızının sinif rəhbəri ilə aralarında keçən telefon danışığının səs yazısını da təqdim edib.

Sayt iddiaların nə dərəcədə əsaslı olub-olmadığını dəqiqləşdirmək, həmçinin qarşı tərəfin də mövqeyini öyrənmək üçün Bakı şəhəri üzrə Təhsil İdarəsinə müraciət edib.

Qurumdan cavab olaraq bildirilib ki, göndərilən səs yazısı məktəbin 8 a sinfinin rəhbəri və eyni zamanda riyaziyyat fənn müəllimi Abdullayeva Züleyxaya və həmin sinifdə təhsil alan Ayselin valideyni Şeydayeva Esmiraya məxsusdur.

Məlumata görə, baş verən mübahisə valideynin iddia etdiyi kimi deyil:

“13.02.2023 cü il tarixində 8a sinif şagirdi Şeydayeva Fatimə 1-ci və 2-ci saat dərslərdə iştirak etməyib. 3-cü dərsin tənəffüs zamanı sinif yoldaşı Babazadə Fəridlə münaqişə yaşayıb və stolu ayağına vurub, söyüş söyərək sinif otağını tərk edib.

Məktəbin giriş qapısına nəzarət edən texniki işçisi Ağayeva Mehribanın məktəbi tərk etməməli olduğu iradına məhəl qoymadan məktəbi tərk edib. Sinif rəhbəri valideynə bu barədə məlumat verdikdə valideyn Şeydayeva Esmira məktəbə aqressiv şəkildə gələrək qışqır bağır salıb. Baş verən hadisə haqqında ətraflı məlumat aktlarda öz əksini tapıb”.

Məktəbdən o da bildirilib ki, 13.02.2023 cü il tarixindən şagird məktəbə gəlmir. Valideyn Esmira Şeydayeva direktora şərt qoyaraq Hüseynin məktəbdən çıxarılmadığı təqdirdə övladı Ayseli məktəbə göndərməyəcəyini bildirib:

“Məktəb rəhbərliyi öz növbəsində şagirdin təhsildən yayındığı barədə Yasamal rayon İcra Hakimiyyəti yanında Yetkinlik yaşına çatmayanların işləri və hüquqlarının müdafiəsi üzrə komissiyasına məlumat verib. Valideyn baş vermiş hadisəni tamamilə fərqli formada Yasamal rayon Prokurorluğuna ərizə şəklində şikayət edib. Prokurorluğa çağırılan Tağıyeva Ruhiyyə, Abdullayeva Züleyxa, Əliyeva Əsmər, 8a sinif şagirdi Hüseyn və valideyni hadisəni olduğu kimi öz izahatları ilə izah ediblər”.