ABŞ senatorları Bakıya qarşı sanksiyalar tələb edir - Rəsmilər əleyhinə

ABŞ senatorları Aleks Padilla və Marko Rubio Senata ABŞ-dan Laçın dəhlizinin blokadasına son qoymaq üçün Azərbaycana təzyiqləri gücləndirməyə çağıran ikipartiyalı qətnamə təqdim ediblər.

AJMEDİA.İNFO xəbər verir ki, bu barədə “Amerikanın səsi” radiostansiyası məlumat yayıb.

“Azərbaycanın Dağlıq Qarabağı blokadaya alması 100 mindən çox ermənini zəruri ehtiyaclardan məhrum edib. Bu qeyri-insani və qəbuledilməzdir. Buna görə də mən indicə bu blokadanı pisləyən və ABŞ-ı təcili tədbirlər görməyə çağıran ikitərəfli qətnamə təqdim etdim”, - Padilla Twitter mikrobloqunda yazıb.

Öz növbəsində Rubio Twitter-dəki mikrobloqunda qeyd edib: “Mən fəxr edirəm ki, senator Padilya ilə birlikdə Laçın dəhlizinin Azərbaycan tərəfindən blokadaya alınmasını pisləyən ikitərəfli qətnamə təqdim etmişəm. Birləşmiş Ştatlar bu humanitar böhranın sona çatmasına kömək etməlidir”.

Qanunvericilik təşəbbüsü, xüsusilə, ABŞ-ı Laçının blokadasına və ermənilərin hüquqlarının pozulmasına görə məsuliyyət daşıyan Azərbaycan rəsmilərinə qarşı sanksiyalar tətbiq etməyə çağırır, həmçinin Bayden administrasiyasını Bakıya istənilən hərbi yardımı dayandırmağa çağırır.

Xatırladaq ki, ABŞ Dövlət Departamentinin Cənubi Qafqaz üzrə danışıqlar üzrə baş müşaviri Luis Bono bu yaxınlarda “Azadlıq” radiosuna müsahibəsində bildirmişdi ki, Vaşinqton Laçın dəhlizinin blokadasına görə Bakıya qarşı sanksiyalar tətbiq etmək fikrində deyil.

“İndi sanksiyaların vaxtı deyil. Mən hər iki tərəflə işləmək və onları sülhə gətirmək üçün buradayam. Sanksiyalar təsirsiz olacaq. Hazırda bu, hətta müzakirə olunmur”, - Bono bildirib.