Səfər Mehdiyev həbs edilir? – Deputatdan AÇIQLAMA

“Söhbət təkcə Dövlət Gömrük Komitəsindən getmir. Bütün idarə və təşkilatlarda, müəssisələrdə, qurumlarda kimsə cinayətə yol veribsə, müvafiq tədbirlər görülməlidir, görülür də... Cənab Prezidentimiz bir dəfə elan etdi ki, korrupsiyaya qarşı mübarizə kampaniyasına başlanılıb və bu işlər davam etdirilir. Kimsə fikirləşsə ki, bu mübarizə dayanacaq və ya kiməsə toxunulmayacaq, səhv fikirləşir. Cənab Prezidentimiz “əyintiyə yol verməyin”, “cinayət törətməyin”, “korrupsiya ilə məşğul olmayın”, “rüşvətxorluğa qarşı mübarizə aparın” deyibsə, deməli, qanunu pozan , bu işlə məşğul olanIara cəza şamil olunacaq. Təkcə Gömrük Komitəsində deyil, hansı qurumlarda belə hallar varsa, o qurumlarda həbslər də olacaq, işdən azad olunmalar da, başqa ciddi tədbilər də görüləcək ki, cəmiyyətimiz bu xəstəlikdən, bəladan xilas ola bilsin”.

AJMEDİA.İNFO xəbər verir ki, bu sözləri Pravda.az-a açıqlamasında Müdafiə, təhlükəsizlik və korrupsiya ilə mübarizə komitəsinin üzvü Elman Məmmədov deyib.

Deputat Dövlət Gömrük Komitəsinin ləğv ediləcəyi ilə bağlı yayılan xəbərlərə də münasibət bildirib: “Kimsə işində səhvə yol verir, məsuliyyətsizlik edirsə, işdən çıxarılır, cinayət törədibsə, həbs olunur. Bu, hər hansı dövlət qurumunun ləğv olunmasına əsas yaratmır. İşdən çıxarılanın yerinə daha məsuliyyətli, qanunlara əməl edən, işinin öhdəsindən gələ bilən ləyaqətli şəxs təyin olunacaq”.

E.Məmmədov DGK-nın sədri, general-polkovnik Səfər Mehdiyevin həbs ediləcəyi ilə bağlı iddialara belə cavab verib: “Səfər Mehdiyevin həbsi ilə bağlı söz demək səlahiyyətimdə deyil. Haqqım yoxdur ki, kiminsə barəsində belə bir ifadə işlədəm, fikir söyləyəm. Hər şey dövlət başçımızın nəzarətindədir və kimin haqqında nə qərar veriləcək, nə olacaqsa, dövlət başçısı həll edir. Burda kimlərinsə söz deməyi yersiz olar...”