"İmzalanmağa hazır sülh müqaviləsi yoxdur" - Paşinyan

“İrəvan və Bakı arasında razılaşdırılmış və imzalanmağa hazır sülh müqaviləsi yoxdur”.
“Sputnik Ermənistan” xəbər verir ki, bunu Ermənistanın Baş naziri Nikol Paşinyan Kişinyovda sülhün bağlanmasının mümkünlüyü barədə verilən sualı cavablandırarkən deyib.
O bildirib ki, Ermənistan tərəfi Vaşinqton görüşündən əvvəl verdiyi təkliflərə hələ də Azərbaycandan cavab almayıb.
“Bu, sənədin dördüncü nəşridir, lakin hələlik heç bir cavab yoxdur”.
Ermənistan Xarici İşlər Nazirliyindən isə bildirib ki, Kişinyov danışıqlarının gündəliyinə İrəvan və Bakı arasında sülh sazişinin imzalanması daxil deyil.
“Təmasların normallaşdırılması və “Sülh və dövlətlərarası münasibətlərin qurulması haqqında” sazişlə bağlı müzakirələr davam edir. Erməni tərəfi bütün fundamental məsələlər aydınlaşdıqdan sonra sənədi imzalamağa hazır olacaq. Onların əlaqələndirilməsi iyunun 1-də Moldovanın paytaxtında, eləcə də Avropa Siyasi Birliyinin iclasından sonra davam etdiriləcək”, - məlumatda deyilir.
Qeyd edək ki, daha əvvəl, Azərbaycanın Fransadakı səfiri Leyla Abdullayeva Avropa Siyasi Birliyinin iyunun 1-də Moldovanın paytaxtı Kişinyovda keçiriləcək növbəti iclasında yeni potensial həlledici müzakirələrin aparılacağını bildirmiş və bunun nəticəsində Azərbaycan və Ermənistan arasında sülh müqaviləsinin imzalana biləcəyini qeyd etmişdi. yeniavaz.com