Dostumun dostu mənim də dostumdur... – Azərbaycan-Türkiyə müttəfiqliyinin QAZANDIRDIQLARI

Adətən, siyasətdə “düşmənimin düşməni mənim dostumdur” yanaşmasından geniş istifadə olunur. Lakin bəzən bu qanunauyğunluq özünü fərqli formalarda da büruzə verə bilir. Məsələn, “dostumun dostu mənim də dostumdur” ideyasını nümunə kimi göstərə bilərik.

Eyni zamanda siyasəti “dost qazanmaq sənəti” kimi qiymətləndirənlər də yanılmırlar. Çünki günümüzdə dünyadan təcrid olunub, hər kəsi düşmən kimi görən ölkələrin nə durumda olduqları daha aydın şəkildə özünü göstərir.
Heç kimə sirr deyil ki, Azərbaycan-Türkiyə müttəfiqliyinin dünyada başqa bir bənzəri, analoqu yoxdur. Çünki hər nə qədər tarixi köklərdən gələn bağlılıq önəmli faktor olsa da, bunu siyasi müstəviyə daşımağa müəssər olanların sayı olduqca məhduddur. Elə Rusiya və Ukraynanı örnək göstərmək kifayətdir. İki slavyan etnosu bu gün bir-birinə düşmən mövqedə dayanıblar və bu nifrət dünyanı ikiyə bölüb.

Rusiya-Ukrayna nümunəsinin tam əksinə isə Azərbaycan-Türkiyə müttəfiqliyi örnəyində şahidlik edirik. Belə ki, iki qardaş ölkənin əməkdaşlığı digər ölkələrlə münasibətlərə də müsbət təsir göstərir. Yəni, Azərbaycan və Türkiyə “dostumun dostu mənim də dostumdur” yanaşmasından uğurla istifadə etməyi bacarırlar.

Müttəfiqliyin qazandırdığı dostlar

Buna ən ideal örnək kimi Türkiyə-İsrail münasibətlərini göstərə bilərik.

Məlumdur ki, 11 il öncə “Mavi Mərmərə” gəmisinə hücumdan sonra Türkiyə-İsrail diplomatik münasibətlərinə son verilmişdi. Dövlətlər arasında münasibətlər isə olduqca gərgin hal almışdı.

Hətta, bəzi mənbələrdə bu soyuqluğun qarşıdurmaya belə gətirib çıxara biləcəyi ehtimalları önə sürülürdü.

Buna paralel olaraq, Azərbaycan-İsrail münasibətləri günü-gündən inkişaf edirdi. İsrail ölkəmizin əsas tərəfdaşlarından biri kimi çıxış edir, hərbi, iqtisadi və mədəni münasibətlərimiz yüksək səviyyədə davam edirdi.

Belə bir vəziyyətdə isə iki dost ölkə arasında münasibətlərin soyuqluğu Azərbaycan üçün heç də müsbət hal sayıla bilməzdi. Bu səbəbdən də, rəsmi Bakı Tel-Əviv – Ankara yaxınlaşmasına nail olmaq üçün ciddi cəhdlə çalışmağa başladı. Xüsusən də, 44 günlük savaşdan sonra Azərbaycanın bu istiqamətdə aktiv səyləri daha çox hiss olunurdu.

Və nəticə bəllidir. Artıq İsrail rəsmilərinin Ankaraya rəsmi səfərləri baş tutub. Bununla yanaşı tərəflər müvafiq olaraq Ankaraya və Tel-Əvivə yeni səfirlər də təyin ediblər.

Digər bir uğurlu örnək kimi, Azərbaycanın İslam Əməkdaşlıq Təşkilatı ilə əlaqələrinin inkişafını göstərə bilərik. Belə ki, Türkiyə təşkilatda uzun illər böyük nüfuza malik idi. Azərbaycanın da təşkilatın önəmli üzvlərindən birinə çevrilməsində Türkiyənin bu nüfuzu ciddi rol oynadı. Bunun nəticəsidir ki, Vətən müharibəsi dönəmində Azərbaycanın haqlı mövqeyinə İƏT-dən ciddi dəstək gəldi.

Hələ çox dostlar qazanacağıq...

Göründüyü kimi, Azərbaycan-Türkiyə müttəfiqliyi regional siyasətdə böyük rol oynamaqla yanaşı, qlobal miqyasda da öz təsirlərini hiss etdirməkdədir. Və bu hələ başlanğıcdır. Əminliklə söyləyə bilərik ki, Bakı və Ankaranın koordinasiya edilmiş xarici siyasəti bizlərə hələ çox dostlar qazandıracaq.

Hətta bu yaxınlıq, gələcəkdə həm Azərbaycana, həm də Türkiyəyə qarşı soyuq münasibət sərgiləyən ölkələrin mövqeyinə də təsir edə bilər. Çünki Azərbaycan-Türkiyə birliyi regionda əsas faktora çevrilməyə günbəgün daha da yaxınlaşır. Bölgəmizin nə qədər strateji əhəmiyyətə malik olduğunu nəzərə aldıqda isə bir sıra digər soyuqluqların da tezliklə tarix olacağını proqnozlaşdırmaq elə də çətin deyil.

Bizim.Media