İsrail şirkətləri işğaldan azad edilmiş ərazilərdə həyata keçirilən layihələrə cəlb edilib

İqtisadiyyat nazirinin birinci müavini Elnur Əliyev İsrail Knessetində Azərbaycan-İsrail parlamentlərarası işçi qrupunun üzvləri ilə görüşüb.

Nazirlikdən bildirilib ki, Elnur Əliyev geniş əlaqələrə malik ölkələrimizin iqtisadi əməkdaşlığının inkişaf etdirilməsi məqsədilə birgə işlərin davam etdirildiyini vurğulayıb.

Qeyd edilib ki, Azərbaycanla İsrail müxtəlif sahələrdə bir-birilərinə qarşılıqlı dəstək göstərir. Yüksək səviyyəli səfərlər, keçirilən görüş və tədbirlər münasibətlərin inkişafında önəmli rol oynayır.

3-cü iclası bu ilin aprelində Bakıda keçirilmiş Azərbaycan Respublikası Hökuməti ilə İsrail Dövləti Hökuməti arasında Birgə Komissiya tərəfdaşlığın inkişafı üçün mühüm platformadır.

Ölkələrimiz arasında iqtisadi-ticarət əməkdaşlığı da genişlənir. Ötən il İsraillə ticarət dövriyyəsi 85 faizdən çox artıb. İsrail şirkətləri ilə birgə investisiya layihələrinin reallaşdırılması üzrə tədbirlər davam edir.
İsraillə innovativ inkişaf və rəqəmsal iqtisadiyyat, energetika, sənaye zonaları və aqroparklar, turizm, su təsərrüfatı, qida təhlükəsizliyi, səhiyyə, humanitar və digər sahələrdə tərəfdaşlığın gücləndirilməsi üçün geniş imkanlar var.

Bunlardan əlavə, İsrail şirkətlərinin azad edilmiş ərazilərimizdə həyata keçirilən reinteqrasiya layihələrinə cəlb edilməsi önəm daşıyır.

İsrail Knessetində Azərbaycan-İsrail parlamentlərarası işçi qrupunun üzvü Yevgeni Sova ölkəsinin Azərbaycanla münasibətlərin inkişafına önəm verdiyini, İsrail şirkətlərinin müxtəlif istiqamətlər üzrə həyata keçirilən layihələrdə, o cümlədən Azərbaycanın azad olunmuş ərazilərinin bərpasında iştirak etməyə maraq göstərdiyini vurğulayıb, əməkdaşlığın inkişafı barədə fikirlərini bölüşüb.

Görüşdə Azərbaycan-İsrail iqtisadi əlaqələrinin hazırkı vəziyyəti və perspektivləri müzakirə olunub. Bizim.Media