Avropa Şurası Bakını insan alveri qurbanlarının müəyyən edilməsi üçün səyləri gücləndirməyə çağırıb

Avropa Şurasının İnsan Alverinə Qarşı Mübarizə üzrə Ekspert Qrupu yeni hesabatında İnsan Alverinə Qarşı Mübarizə üzrə Avropa Şurasının Konvensiyasının icrası ilə bağlı 2018-ci ilin noyabrında Azərbaycan üzrə ikinci GRETA qiymətləndirmə hesabatının dərcindən sonra baş verənləri qiymətləndirir.

AJMEDİA.İNFO xəbər verir ki, bu barədə Avropa Şurasının saytında dərc edilmiş bəyanatda deyilir.

“GRETA Azərbaycan hakimiyyətini qurbanların hüquqi yardıma çıxışını və mövcud kompensasiya mexanizmlərini yaxşılaşdırmaq üçün addımlar atmağa çağırır. Bundan əlavə, hesabatda insan alveri qurbanlarının əmək bazarına səmərəli çıxışını gücləndirmək və onların sosial və iqtisadi inteqrasiyasını təşviq etmək üçün əlavə addımların atılmasının zəruriliyi vurğulanır.

GRETA Azərbaycanda, xüsusən də qeyri-qanuni miqrantlar və sığınacaq axtaran şəxslər arasında qurbanların müəyyən edilməsi üçün fəal səylərin olmamasından narahatlıqla qeyd edir və Azərbaycan hakimiyyətini qurbanların müəyyən edilməsi üçün səyləri gücləndirməyə çağırır.

Azərbaycan əsasən insan alveri qurbanlarının mənşə ölkəsi olmaqla yanaşı, həm də müəyyən dərəcədə təyinat ölkəsidir. Rəsmi qurumların təqdim etdiyi statistik məlumatlara görə, 2018-2022-ci illərdə müəyyən edilmiş qurbanların sayı 472 nəfər olub ki, bu da əvvəlki hesabat dövrü ilə müqayisədə çoxdur. Müəyyən edilmiş qurbanların 94%-i cinsi istismar məqsədi ilə insan alverinin qadın qurbanlarıdır. Yalnız doqquz uşaq insan alverinin qurbanı kimi tanınıb”, - hesabatda deyilir.