Dövlət Departamenti: ABŞ Tbilisidə sərbəst toplaşmaq hüququndan istifadə edənlərin yanındadır

Dinc etirazçıların sərbəst toplaşmaq hüququndan istifadə etməsinə icazə verilməlidir.

APA xəbər verir ki, bunu ABŞ Dövlət Departamentinin sözçüsü Ned Prays Tbilisidə parlament binası qarşısındakı etirazçılara polisin müdaxiləsinə münasibət bildirərkən deyib. O, ABŞ-ın Gürcüstandakı hadisələri yaxından izlədiyini, “xarici agentlər” haqqında qanun layihəsinə etiraz edənlərə qarşı gözyaşardıcı qaz və digər vastələrin tətbiq edilməsi ilə bağlı xəbərlər aldığını bildirib.

“Bizim Gürcüstan hökumətinə və xalqına mesajımız budur ki, ABŞ öz universal hüquqlarından dinc şəkildə istifadə edənlərin yanındadır, bu universal hüquqlar sərbəst toplaşmaq, səsini ucaltmaq, azad şəkildə danışmaq, öz hökumətini məsul tutmaqdır. Biz Gürcüstanda vəziyyətin monitorinqini davam etdirəcəyik. Bizim mesajmız budur ki, dinc aksiyaçılara bu hüquqlarından dinc şəkildə istifadə etmələrinə icazə verilməlidir”, - deyə Ned Prays keçirdiyi brifinqdə bildirib.