Bütün dünya ölkələrində olduğu kimi, Azərbaycanda da koronavirus infeksiyasının “Omikron” ştammına yoluxma halları üstünlük təşkil edir. Və o, məlum olduğu kimi, tez-tez uşaqlara təsir göstərir.

AJMEDİA.İNFO xəbər verir ki, Xoşbəxtlikdən, onların əksəriyyəti infeksiyanı yüngül keçirir, lakin yanaşı xəstəlikləri olan yeniyetmələrdə xəstəlik ağır keçə bilər.

7 saylı Uşaq Yoluxucu Xəstəliklər Xəstəxanasının baş həkimi Mehriban İsayeva ilə söhbətləşib və uşaqların koronavirus tibb müəssisəsinə yerləşdirilmə prosesinin necə aparıldığını öyrənib:

- Bir qayda olaraq, uşaqlar koronavirus xəstəxanalarına valideynsiz yerləşdirilir.

- Lap kiçiklər də?

- Bəli, yaşından asılı olmayaraq. Bunlar yeni doğulmuş və ya 18 yaşa qədər yeniyetmələr ola bilər.

- Bəs valideynləri onları buraxırlar?

- Əksər hallarda valideynlər azyaşlı övladını xəstəxanaya buraxmağa hazır olmurlar. Bir qayda olaraq, analar uşaqları ilə birlikdə xəstəxanaya yerləşdirilmələrini xahiş edirlər.

- Valideyn yoluxmasa belə bu mümkündür?

- Bəli, amma bu halda həkimlər yüksək virus yükünü nəzərə alaraq tibb müəssisəsinin daxilində mümkün infeksiya riskini izah edirlər. Uşağı ilə xəstəxanaya yerləşdirilmək istəyən valideyn müvafiq sənədi imzalayır və yalnız bundan sonra xəstəxanaya yerləşdirilir.

- Söhbət hansı sənəddən gedir?

- Bu sənəddə bildirilir ki, valideyn həkimin dediyi bütün mümkün risklərlə tanış olub, onları qəbul edir və bütün məsuliyyəti öz üzərinə götürür.

- Valideyn (infeksiyaya yoluxmayan) uşaqla sizin şöbəyə gələrsə, profilaktik müalicə almalıdır?

- Yox, amma eyni zamanda valideyn mütəmadi olaraq bütün lazımi tibbi müayinələrdən keçir.

- Olubmu ki, ailəlikcə sizə müraciət edələr?

- Çox vaxt məhz belə olur. Valideynlər və uşaq xəstəxanaya daxil olur. Xəstəxanada müalicə simptomatik aparılır, əgər valideyn asimptomatikdirsə, heç bir müalicə təyin edilmir, lakin bütün lazımi tibbi müayinələr aparılır.

- Uşaqlar ən çox hansı yaşda valideynləri olmadan qalırlar?

- Bir qayda olaraq, bunlar 12 yaşdan yuxarı olanlardır.

- Onlara tibb işçiləri qulluq edir?

- Bəli, biz onlara xəstələrin baxıcısı deyirik. Amma qeyd etmək istəyirəm ki, biz heç bir halda uşaqları nənələri ilə xəstəxanaya yerləşdirmirik.

- Uşağı nənəsi ilə xəstəxanaya göndərmək istədikləri hallarla rastlaşmısınız?

- Bəli, amma yaşlılar xüsusi risk qrupundadırlar, ona görə də buna icazə verə bilmərik. Xəstəxanaya yerləşdirmə yalnız valideynlərdən biri ilə mümkündür.