Varlanan kimi biri məşuqə saxlayır, biri itinə toy edir... - Seymur Verdizadə

"Miss Azərbaycan-2017"nin qalibi, aparıcı-model Razi Əliyevanın döyülməsi ölkədə böyük səs-küyə səbəb olub.Fiziki şiddətlə yanaşı, modelin ailəli biri ilə münasibətdə olması, dəbdəbəli həyat sürməsi də müzakirə yaradıb.Tez-tez efirə çıxan, sosial şəbəkədə geniş izləyici kütləsi olan tanınmışlara qarşı fiziki zorakılıq pislənilsə də, onların bəzi davranışlarının gənclərə mənfi təsir göstərdiyi ilə bağlı fikirlər də səslənir.

AJMEDİA.İNFO xəbər verir ki, Jurnalist Araşdırmaları Mərkəzinin sədri Seymur Verdizadə Bakupost.az -a açıqlamasında modelə qarşı şiddəti qınayıb:

“Razi Əliyevanı şəxsən tanımıram. Motivindən asılı olmayaraq, bütün zorakılıq hallarını qınayıram. Səbəb nə olursa-olsun, heç kimin zorakılığa əl atmağa, bir qadını vəhşicəsinə döyməyə haqqı yoxdur. Biz hüquqi dövlətdə yaşayırıq. Əminəm ki, zorakılığa yol vermiş şəxs qanun qarşısında cavab vərəcək”.

Onun sözlərinə görə, Razi Əliyevanın davranışları da gənclər üçün yaxşı nümunə deyil:

“Onun Azərbaycan cəmiyyəti üçün etalon olduğunu düşünmürəm. Vitrində olsalar da, yaxşı nümunə deyil. İnsanın dəbdəbəli həyat təzrini hər fürsətdə gözə soxması onun mənəvi kasadlığından xəbər verir. Təəssüf ki, Azərbaycanda milli burjuaziya formalaşmayıb. Bu proses çox ləng gedir. Ordan-burdan 5 manat oğurlayanlar, büdcəni talayanlar milli burjuaziya sayıla bilməz. Bu adamlar asan yolla pul qazandıqları üçün onun qədrini bilmirlər. Azərbaycanda bəzi kişilər varlanan kimi məşuqə saxlamağa can atır, ya da lazımsız işlərlə məşğul olur. Məsələn, itinə toy edir. Bu cür mənfi tendensiyalar gənclərimiz üçün pis nümunədir və təbliğ olunmamalıdır”.