Ukrayna koronavirusla bağlı tətbiq etdiyi bəzi məhdudiyyətləri ləğv edir

Ukrayna Nazirlər Kabinetinin bu gün keçirilən iclasında ölkədə koronavirusla bağlı tətbiq edilən bəzi qadağaların aradan götürülməsinə dair qərar verilib. AZƏRTAC xəbər verir ki, qərara əsasən mayın 25-dən Kiyev metrosu fəaliyyətini bərpa edəcək. Sərnişinlər metroya girərkən qoruyucu vasitələrdən istifadə etməli və göstərilən məsafəni gözləməlidir.

Nazirlər Kabineti, həmçinin mayın 25-dən Ukraynada uşaq bağçalarının fəaliyyətinə icazə verib. Lakin gündəlik olaraq uşaqların hərarəti ölçüləcək. Hərarəti 37,2 dərəcədən yuxarı olan uşaqlar bağçaya buraxılmayacaq. Həmçinin gündəlik olaraq uşaq bağçaları dezinfeksiya olunacaq.

Mayın 22-dən Ukraynada şəhər və şəhərətrafı ictimai nəqliyyatın fəaliyyətinə də icazə verilib.

Ukrayna, həmçinin Avropa İttifaqı ölkələri ilə - Macarıstan, Rumıniya, Polşa, Slovakiya sərhədləri açır. Bundan əlavə qonşu Moldova ilə də sərhədlərin açılması qərarı verilib. Rusiya və Belarusla sərhədlər hələ ki, bağlı qalacaq.

Qeyd edək ki, ölkədə karantin müddəti iyunun 22-dək uzadılıb.