İspaniya Slovakiya və Rumıniyaya daha 800 hərbçi göndərəcək

İspaniya Şərqi Avropada NATO qüvvələrini gücləndirmək üçün əlavə 800 hərbçi göndərməyi planlaşdırır.

Bu barədə "El Pais" qəzeti məlumat yayıb.

Qəzetin yazdığına görə, İspaniya NATO-nun Slovakiyada yerləşdirdiyi və hazırda Çexiyanın rəhbərlik etdiyi döyüş qrupunun rəhbərliyini öz üzərinə götürmək niyyətindədir.

Beləliklə, Madrid Slovakiyaya 600, Rumıniyaya isə 200 hərbçi göndərəcək.

Slovakiyanın müdafiə naziri Martin Sklenar NATO-nun sammitində jurnalistlərə deyib ki, ölkəsinin müdafiəsi bir neçə yüz ispan əsgəri tərəfindən daha da gücləndirilməlidir.

Qəzet bildirir ki, ordunun yerləşdirilməsi 2024-cü ildə baş tutacaq.