İran parçalanacaq və yerində 5 dövlət yaranacaq – ADLAR

İranda davam edən etirazlar artıq 68-ci gününə qədəm qoyub. Sular isə durulmaq bilmir. Belə ki, dinc nümayişlər artıq silahlı toqquşmalar mərhələsinə keçib. Bir sıra əyalətlərdə nümayişçilər barrikadalar qurub, rejim güclərinə qarşı silahlı müqavimətə start veriblər.

Molla rejimi aksiyalara qarşı ritorikasını korrektə etmək yerinə, durumu daha da ağırlaşdıracaq addımlar atmağa davam edir. Etirazçılar gülləbaran edilir, saxlanılan fəallara ölüm hökmü kəsilir.
Ali Rəhbər Ayətullah Əli Xamanei də son açıqlamalarında nümayişçilərin sərt şəkildə cəzalandırılacağını bəyan etdi. Aksiyalar davam edir, rejim isə geri addım atmır. Nəticədə təbii olaraq, radikalizm daha da güclənir.
Dolayısı ilə İranda parçalanmalar da qaçılmazdır. Çünki İranda hakimiyyət dəyişikliyi olsa belə, böyük ehtimalla demokratik qüvvələr hakimiyyətə gələcək. Bu da ölkədə yaşayan etnoslara bir sıra hüquqların verilməsini zərurətə çevirəcək.

Nəticə olaraq, İranda bir müddətdən sonra muxtariyyətlərin yaranması, sonradan müstəqillik ideyalarının daha da genişlənməsi ehtimalı böyükdür.

Hadisələrin bu cür gedişatı, sonda Güney Azərbaycan, Kürdüstan, Bəlucistan, Xorasan, Qaşqayistan kimi dövlətlərin yaranması ilə nəticələnə bilər.

Görünən qədərilə, molla rejimi geri addım atmaq niyyətində deyil, hətta vətəndaş müharibəsi başlasa belə. Lakin bu xəmir hələ çox su aparacaq. Çünki Tehran rejimi can verməkdə olsa belə, unutmamalıyıq ki, ilanın ən təhlükəli olduğu vaxtı yaralı olduğu zamanlardır...

Bizim.Media