Si Cinpin KXDR-lə münasibətləri inkişaf etdirməyə hazır olduğunu bildirib

Çin Sədri Si Cinpin Şimali Koreya lideri Kim Çen Ina teleqram göndərərək, ikitərəfli münasibətləri inkişaf etdirməyə hazır olduğunu bildirib.

Bu barədə Koreyanın Mərkəzi Xəbər Agentliyi məlumat yayıb.

Si Cinpin teleqramında qeyd edib ki, KXDR və Çin “mehriban qonşudur”. Bundan əlavə, Çin sədri dostluq və əməkdaşlığın inkişafına, eləcə də onların daim yeni səviyyəyə yüksəlməsinə kömək etməyə hazır olduğunu bildirib.

Vurğulanır ki, Çin lideri regionda və planetdə sülhün, sabitliyin və rifahın möhkəmləndirilməsinə töhfə verməyə hazırdır.

Bundan əvvəl Kim Çen In Si Cinpini yenidən Çin Xalq Respublikasının Sədri seçilməsi münasibətilə təbrik edib. KXDR lideri vurğulayıb ki, “iki ölkə sıx dəstək və həmrəyliyi qoruyaraq, sosializmin ümumi işini müdafiə edir və təbliğ edir”. O, ümid etdiyini bildirib ki, KXDR ilə Çin arasında dostluq münasibətləri bundan sonra da “dərinləşəcək və inkişaf edəcək”.