Ötən gün vəzifədən istefa verən Azər Zeynalov həbs olunub? - AÇIQLAMA

Sosial şəbəkələrdə Naxçıvan Muxtar Respublikası Ali Məclisi sədrinin birinci müavini vəzifəsindən istefa verən Azər Zeynalovun həbs olunması ilə bağlı məlumatlar yayılıb.İddialara görə o, güc strukturları tərəfindən saxlanılaraq istintaqa cəlb olunub.

AJMEDİA.İNFO xəbər verir ki, məsələ ilə bağlı Bizim Media Azər Zeynalova zəng edib. A.Zeynalov zənglərə cavab verməsə də "Watsapp” yazışması üzərindən sözügedən iddialara cavab verib:

"Rəsmi məlumatlara istinad edin. Özüm cavab yazdım”, - deyə fikirlərini bu ifadələrlə tamamlayıb.

Xatırladaq ki, oktyabrın 5-də Altıncı çağırış Naxçıvan Muxtar Respublikası Ali Məclisinin 2023-cü il payız sessiyasının növbəti iclası keçirilib. İclasda Ali Məclis sədrinin birinci müavini Azər Zeynalov istefa ilə bağlı müraciət edib. Müzakirə olunan məsələ ilə əlaqədar qərar layihəsi oxunduqdan sonra səsə qoyularaq qəbul edilib.

Qeyd edək ki, Azər Zeynalov 1970-ci ildə Şərur şəhərində anadan olub. Ötən il Vasif Talıbovun istefasından sonra yeni sədr seçilənədək Naxçıvan Muxtar Respublikası Ali Məclisi sədri vəzifəsinin icrası müvəqqəti olaraq sədrin birinci müavini Azər Zeynalova həvalə edilib.