Azad olunan ərazilərin bərpasına ayrılan vəsait 856 milyon azaldılır

Gələn il dövlət büdcəsindən tikinti və şəhərsalmaya 6 milyard 687 milyon 457 min manat vəsaitin ayrılması nəzərdə tutulur.
AJMEDIA.INFO xəbər verir ki, bu, Prezident İlham Əliyevin bu gün təsdiq etdiyi “2025-ci il dövlət büdcəsi haqqında” Qanunda yer alıb.

Müqayisə üçün bildirək ki, bu ilin dövlət büdcəsi ilə müqayisədə tikinti və şəhərsalma xərcləri 1 milyard 423 milyon 883 min 300 manat və ya 17,6% azalacaq. Belə ki, bu il tikinti və şəhərsalma xərcləri 8 milyard 111 milyon 340 min 300 manat olub.

Qeyd edək ki, gələn il tikinti və şəhərsalma xərclərinin 2 milyard 685 milyon 400 min manatını investisya xərcləri, 4 milyard manatını isə işğaldan azad olunmuş ərazilərin yenidən qurulması və bərpası xərcləri təşkil edəcək.

Onu da bildirək ki, bu il investisya xərcləri 3 milyard 254 milyon, işğaldan azad olunmuş ərazilərin yenidən qurulması və bərpası xərcləri isə 4 milyard 855 milyon 800 min manat olub.//Yeniavaz.com