ABŞ Gürcüstan rəsmilərinə sanksiya tətbiq etdi

ABŞ Maliyyə Nazirliyinin Xarici Aktivlərə Nəzarət Ofisi (OFAC) Gürcüstanda təməl azadlıqları, o cümlədən ifadə azadlığını pozan şəxslərə qarşı sanksiyalar tətbiq edib.

Yenisabah.az xəbər verir ki, məhdudiyyətlər Gürcüstan hökumətində “dinc nümayişçilərə və siyasi rəqiblərə qarşı amansız repressiya” ilə bağlı iki məmura və sərbəst toplaşmaq və dinc ifadə azadlığının zorakılıqla boğulmasında birbaşa və ya dolayısı ilə iştirak etmiş iki fərdi şəxsə qarşı tətbiq edilib.

Siyahıda Gürcüstan Daxili İşlər Nazirliyinin Xüsusi Təyinatlar Departamentinin rəhbəri Zviad Xarazişvili və onun müavini Mileri Laqazaurinin adı var. Bundan əlavə, siyahıya ultra-mühafizəkar rusiyayönlü Alt-İnfo (“Alt-info”) platformasının liderləri Zurab Maxaradze və Konstantin Morqoşia daxildir.

Vaşinqtonun fikrincə, ilk iki şəxs “xarici agentlər” qanununa qarşı etirazların yatırılmasına məsuldur. OFAC əlavə edib ki, "Alt-Info" rəhbərləri 2021 və 2023-cü illərdə jurnalistləri, azlıq qruplarını və qeyri-hökumət təşkilatlarının ofislərini hədəfə almaqda iştirak ediblər.

ABŞ Dövlət Departamenti “Gürcüstanda demokratiyanın pozulmasında iştirak edən” 60-dan çox Gürcüstan vətəndaşı və onların ailə üzvlərinə viza məhdudiyyəti qoyur.